Gwobr y Comisiynydd Heddlu a Throseddu i gyn-Ddirprwy Brif Erlynydd y Goron
Ar ddydd Gwener 4ydd Gorffennaf 2025, dyfarnwyd Gwobr Partneriaeth Comisiynydd yr Heddlu a Throseddu i'r cyn-Ddirprwy Brif Erlynydd y Goron, Iwan Jenkins, yn Seremoni Wobrwyo Flynyddol Heddlu Dyfed-Powys.
Cyflwynwyd Gwobr Partneriaeth Comisiynydd yr Heddlu a Throseddu i Mr Jenkins i gydnabod ei ran weithredol yng ngwaith partneriaethau cyfiawnder troseddol lleol a chenedlaethol dros y blynyddoedd tan ei ymddeoliad diweddar.
Ymunodd Iwan Jenkins â'r CPS ym 1992 ar ôl gweithio fel cyfreithiwr amddiffyn troseddol am sawl blwyddyn. Arweiniodd wahanol dimau a ffrydiau gwaith o fewn CPS Cymru, gan gynnwys Llys y Goron, Treisio a Throseddau Rhywiol Difrifol, ac Uned Achosion Cymhleth. Hyd at ei ymddeoliad diweddaraf, ef oedd y Dirprwy Brif Erlynydd y Goron dros dro gyda chyfrifoldeb am waith yr Uned Achosion Cymhleth a Llys yr Ynadon.
Iwan oedd arweinydd yr ardal ar gyfer sawl prosiect. Yn fwyaf diweddar, arweiniodd yr ymgysylltiad â Llywodraeth Cymru wrth gynllunio a chyflawni'r newidiadau a ddaeth yn sgil Deddf Plant (Diddymu Amddiffyniad Cosb Resymol) (Cymru) 2020.
Cymhwysodd Iwan fel Eiriolwr Llys Uwch ym 1999 ac mae wedi erlyn treialon yn Llys y Goron ac wedi ymddangos yn y Llys Apêl.
Yn 2019 penodwyd Iwan yn Llywydd Tribiwnlys y Gymraeg ac mae'n gyfrannwr rheolaidd ar faterion cyfreithiol ar y cyfryngau Cymraeg.
Wrth gyflwyno'r Wobr i Iwan Jenkins, dywedodd Comisiynydd Heddlu a Throseddu Dyfed-Powys, Dafydd Llywelyn, “Mae Byrddau Cyfiawnder Troseddol yn darparu fforwm gwerthfawr ar gyfer gweithio traws-sefydliadol ac yn sicrhau bod y rhai yr effeithir arnynt gan drosedd yn cael y gwasanaethau gorau posibl i'w cefnogi drwy'r broses cyfiawnder troseddol.
“Mae'r gwaith hwn yn dibynnu'n fawr ar ymrwymiad partneriaid ac mae arweinyddiaeth, ymgysylltiad a chyfraniad Iwan at y gwaith hwn wedi cael eu gwerthfawrogi nid yn unig gennyf fi fel Comisiynydd Heddlu a Throseddu, ond gan holl aelodau ein Bwrdd Cyfiawnder Troseddol Lleol.
“Yn arbennig rydym yn ddiolchgar am gyfraniadau Iwan at symud agenda’r dioddefwyr ymlaen, a’r arweinyddiaeth a gymerodd yn y darn o waith athreuliad DA, sydd ill dau yn flaenoriaethau allweddol i mi ac i Heddlu Dyfed-Powys.”
Wrth dderbyn y wobr, dywedodd Mr Iwan Jenkins: "Roedd yn anrhydedd bersonol fawr i mi dderbyn y wobr hon gan gydnabod mai dim ond trwy ymrwymiad cydweithwyr ar draws llawer o asiantaethau y mae llwyddiant mewn gwaith gwasanaeth cyhoeddus yn bosibl."
DIWEDD
Gwybodaeth bellach:
Article Date: 14/07/2025