07 Medi 2023
Mae Comisiynydd Heddlu a Throseddu Dyfed-Powys (CHTh) Dafydd Llywelyn wedi cyhoeddi ei adroddiad blynyddol diweddaraf sy’n edrych yn ol ar y cyfnod rhwng 1 Ebrill 2022 a 31 Mawrth 2023 ac yn taflu goleuni ar y cynnydd a wnaed yn erbyn blaenoriaethau Cynllun Heddlu a Throseddu 2021-25.
Mae'r cyhoeddiad yn rhoi'r wybodaeth ddiweddaraf am brosiectau a mentrau allweddol y mae'r CHTh a'i swyddfa yn gweithio arnynt mewn partneriaeth ag amrywiaeth o asiantaethau ar lefel leol a chenedlaethol i sicrhau bod ymagwedd unedig at atal a lleihau trosedd. Mae'r adroddiad hefyd yn cynnwys gwybodaeth ar berfformiad yn ymwneud â'r tri maes blaenoriaeth a fabwysiadwyd yn y Cynllun Heddlu a Throseddu, sef:
- Cefnogi Dioddefwyr
- Atal Niwed
- System Cyfiawnder mwy effeithiol
Yn ei Ragair, dywedodd Comisiynydd Heddlu a Throseddu Dyfed-Powys, Dafydd Llywelyn:
“Mae 2022-23 wedi bod yn flwyddyn heriol ond cynhyrchiol i bawb sy’n ymwneud â Phlismona. Dyma’r ail flwyddyn o gyflawni prosiectau sy’n cyd-fynd â’m blaenoriaethau allweddol o’m Cynllun Heddlu a Throseddu ar gyfer 2021-25.
“Mae’r gwaith wedi’i wneud yn erbyn cefndir o bwysau ariannol parhaus a hyder isel y cyhoedd mewn plismona ledled Cymru a Lloegr.
“Mae fy swyddfa a minnau wedi gweithio’n galed, ynghyd â’r Heddlu, i sicrhau ein bod mor effeithlon ag y gallwn fod, gan sicrhau gwerth am arian bob amser a darparu gwasanaethau hynod effeithiol i’r rhai sydd eu hangen.
“Mae gweithio mewn partneriaeth yn flaenoriaeth allweddol i mi. Dim ond trwy gydweithio ar draws y sector cyhoeddus a gydag arbenigwyr pwnc y gellir darparu system gyfiawnder effeithiol. Fel yr ‘Hyrwyddwr Dioddefwyr’ lleol, mae gwrando a dysgu o farn y rhai sydd wedi cael profiad uniongyrchol o’r system cyfiawnder troseddol yn hollbwysig, yn ogystal â darparu gwasanaethau effeithiol i ddioddefwyr. Rwy’n falch o waith y Fforwm Ymgysylltu â Dioddefwyr a’r ffordd y mae eu hadborth wedi’i ddefnyddio i wella gwasanaethau dros y flwyddyn ac edrychaf ymlaen at barhau, ac yn wir, cynyddu gweithgarwch o’r fath.
“Mae ymyriadau cynnar a dulliau datrys problemau yn hanfodol i atal niwed, a dyna pam fy mod yn buddsoddi mewn ystod eang o rhaglenni atal a dargyfeirio ledled ardal Dyfed-Powys.
“Uchafbwynt nodedig i mi yn ystod y flwyddyn oedd pan gynhalion ni’r Angel Cyllyll yn Aberystwyth. Er mai ardal Dyfed-Powys yw’r mwyaf diogel yng Nghymru a Lloegr gyda lefelau isel o droseddau treisgar – yn enwedig troseddau cyllyll, rhaid inni gydnabod nad ydym yn imiwn ac mae angen clywed y negeseuon gwrth-drais a gwrth-ymosodedd.
“Rwy’n ddiolchgar am yr ymgysylltu a’r cydweithio cadarnhaol yr ydym wedi’u cyflawni drwy nifer o bartneriaethau ar draws ardal Dyfed-Powys sydd i gyd yn canolbwyntio ar wella gwasanaethau ar gyfer ein cymunedau lleol. Rwy’n hyderus y bydd y dull partneriaeth hwn yn parhau dros y flwyddyn i ddod er mwyn gwella gwasanaethau ymhellach.
“Wrth i ni symud ymlaen, hoffwn ailadrodd ein hymrwymiad i adeiladu cymunedau fwy diogel, mwy gwydn i bawb. Mae Adroddiad Blynyddol 2022-23 yn destament i’n cynnydd ac yn atgyfnerthu ein penderfyniad i wireddu gweledigaeth Dyfed-Powys o gymunedau diogel.
Gellir gweld Adroddiad Blynyddol 2022-23 ar wefan swyddogol y Comisiynydd Heddlu a Throsedd yma.
DIWEDD
Rhagor o fanylion:
OPCC.Communication@dyfed-powys.police.uk
