26 Medi 2023
Mae’r Gymdeithas Comisiynwyr Heddlu a Throseddu (APCC) wedi cyhoeddi’r rhifyn diweddaraf o’u cyhoeddiad ‘In Focus’ sy’n canolbwyntio ar ‘Dulliau Arloesol ac Effeithiol o Fynd i’r Afael â Thrais Difrifol’.
Mae’r cyhoeddiad yn tynnu sylw at raglen atal ac ymyraeth Heddlu Dyfed-Powys – INTACT / CYFAN, fel enghraifft o arfer da.
Mae troseddau treisgar yn cael effaith ddinistriol ar ddioddefwyr a chymunedau, ac mae’n hynod gostus i gymdeithas, ond ni all heddluoedd ac asiantaethau eraill weithio ar eu pen eu hunain i fynd i’r afael ag ef.
Mae cyhoeddiad ‘In Focus’ yr APCC yn amlinellu’r gwaith hanfodol y mae Comisiynwyr yr Heddlu a Throseddu (CHTh) yn ei wneud ledled Cymru a Lloegr gyda’u heddluoedd a phartneriaid lleol, i hwyluso partneriaethau aml-asiantaeth effeithiol i atal trais difrifol.
Mae’n amlygu dulliau cydweithredol sy’n seiliedig ar dystiolaeth sy’n allweddol i wneud ein cymunedau’n fwy diogel.
Wedi'i gynnwys yng nghyhoeddiad In Focus mae trosolwg manwl o ddull Dyfed-Powys o fynd i'r afael â thrais difrifol a throseddau trefniadol (SVOC) yn ardal Dyfed-Powys, trwy'r fenter CYFAN.
Mae CYFAN yn bartneriaeth aml-asiantaeth i frwydro yn erbyn SVOC yn Sir Gaerfyrddin, Ceredigion, Sir Benfro a Phowys.
INTACT / CYFAN yw brand y prosiect ac mae'n cynrychioli ymateb y bartneriaeth i SVOC.
Prif nod CYFAN yw cydlynu a chyflwyno rhaglenni ymyrraeth gynnar, sy’n amrywio o ymgysylltu â’r cyhoedd ac addysgu, i ymwneud un-i-un ag unigolion penodol, gan dynnu ar ystod o lenyddiaeth ac egwyddorion sefydledig ym maes troseddau ieuenctid a chyfiawnder.
Dywedodd Comisiynydd Heddlu a Throseddu Dyfed-Powys, Dafydd Llywelyn:
“Fel Comisiynydd Heddlu a Throseddu Dyfed-Powys, rwy’n credu’n gryf bod mynd i’r afael â throseddau trais difrifol yn ei gwneud yn ofynnol i ni esblygu’n barhaus a chofleidio dulliau arloesol ac effeithiol.
“Diogelwch ein cymunedau yw ein prif flaenoriaeth, ac rydym yn cydnabod nad yw dulliau plismona traddodiadol yn unig yn ddigon i fynd i’r afael â’r heriau cymhleth a achosir gan drais difrifol.
“Er mwyn amddiffyn ein trigolion a sicrhau dyfodol mwy disglair a diogel, rydym wedi ymrwymo i gydweithio â phartneriaid lleol i ddatblygu strategaethau blaengar fel CYFAN, sy’n atal a brwydro yn erbyn trais difrifol o fewn ein cymunedau, ac rwy’n falch o weld y cynllun arloesol hwn yn Nyfed-Powys yn cael ei amlygu yng nghyhoeddiad In Focus yr APCC.”
Dywedodd Arweinwyr Trais Difrifol APCC, Simon Foster a Steve Turner:
"Mae Comisiynwyr yr Heddlu a Throseddu wedi chwarae rhan allweddol wrth gyflawni'r Ddyletswydd Trais Difrifol (y Ddyletswydd) ers iddi gael ei chyflwyno ym mis Ionawr 2023. Mae'r Ddyletswydd yn nodi bod gan awdurdodau penodol ddyletswydd i gydweithio i atal a lleihau trais difrifol. Mae Comisiynwyr wedi derbyn rôl statudol y prif gynullydd o dan y Ddyletswydd, sy’n eu gosod wrth wraidd gweithredu strategaeth leol yn y dull cydgysylltiedig hwn. Fel Cyd-Arweinwyr ar Drais Difrifol a Dynladdiad, mae’r ddau ohonom yn awyddus i sicrhau gwerthusiad cadarn o’r Ddyletswydd, gan gynnwys manteisio i'r eithaf ar y cyfle i rannu arfer gorau a dysgu.
“Mae’r ‘In Focus’ hwn yn amlygu’r gwaith arloesol a chyffrous sy’n digwydd o amgylch y wlad. Gyda’r Ddyletswydd newydd yn dod â mwy o ffocws ar faterion troseddau treisgar, rydym yn hyderus mai’r dulliau hyn yw’r allwedd i wneud ein cymunedau’n fwy diogel.”
Mae enghreifftiau eraill o arfer da yn yr adroddiad yn cynnwys:
Operation Deter yn Thames Valley - rhaglen sy'n cyfuno dau ddull; un dull cyfiawnder troseddol mwy cadarn ar gyfer oedolion y canfyddir bod ganddynt arf ymosodol yn eu meddiant, ac un gwahanol ar gyfer pobl ifanc, gydag ymyriad cynharach a dwys drwy raglen Deddf Nawr y Tîm Troseddau Ieuenctid i anelu at eu dargyfeirio o’r system cyfiawnder troseddol a thrwy hynny eu hatal ymhellach rhag troseddu.
Prosiect Cludwyr Cyllyll Arferol (HKC) yn Sussex sy'n defnyddio mynegai risg HKC i nodi'r bobl ifanc hynny sydd fwyaf tebygol o gario cyllyll. Mae’r offeryn arloesol hwn wedi’i ddatblygu gan Heddlu Sussex a dyma’r cyntaf o’i fath yn y wlad.
Mae Rhaglen Llywiwr A&E yn flaenllaw ym Mhartneriaeth Lleihau Trais Gorllewin Swydd Efrog. Drwy leoli gweithwyr ieuenctid hyfforddedig ac ymroddedig o fewn adrannau brys ysbytai, mae’n cyrraedd y rhai mewn argyfwng ar yr adeg gywir ac ar yr adeg ‘addysgiadol’ honno. O ymwneud â throseddau cyllyll, ymosod ag arf i gyffuriau, gangiau a chamfanteisio, mae'n caniatáu i weithwyr proffesiynol ymyrryd cyn gynted â phosibl.
Prosiect Cynghrair Ffydd Gorllewin Canolbarth Lloegr - rhwydwaith aml-ffydd rhanbarthol sy'n dod â grwpiau ffydd a sefydliadau ynghyd o amgylch agenda lleihau trais. Ym mis Tachwedd 2022, cydnabuwyd y Gynghrair Ffydd fel arfer gorau gan adroddiad o’r enw Faith in Prisons, a gyhoeddwyd gan y Good Faith Partnership ac a lansiwyd yn y Senedd.
Dywedodd y Gweinidog Plismona, Chris Philp AS:
“Mae’r adroddiad hwn yn amlygu’r union fath o weithgarwch y dylem fod yn ymdrechu i’w wneud ledled y wlad i fynd i’r afael â’r mater hwn – arloesi, wedi’i seilio ar dystiolaeth ac sy’n canolbwyntio ar frwydro yn erbyn achosion sylfaenol troseddau treisgar.
“O ran trais difrifol, nid oes unrhyw atebion syml. Yn lle hynny, rhaid i ni gynnal ymagwedd fforensig â ffocws i fynd i’r afael â’i achosion a’i ganlyniadau.”
DIWEDD
Rhagor o ranylion:
OPCC.Communication@dyfed-powys.police.uk
