19 Gor 2023
Ddydd Llun 17.07.23, bu’r Comisiynydd Heddlu a Throseddu (CHTh) Dafydd Llywelyn yn cadeirio cyfarfod o’r Bwrdd Atebolrwydd Plismona lle cafwyd trafodaethau ynghylch y cynnydd parhaus yn y galw am ymateb brys.
Roedd y data a gyflwynwyd i CHTh Dafydd Llywelyn yn y cyfarfod yn dangos nid yn unig bod y galw’n cynyddu, ond bod cynnydd hefyd wedi bod yn hyd cyfartalog galwadau ers Rhagfyr 2022, gyda phryderon wedi’u codi gan CHTh hyn yn effeithio ar gyflymder cyfartalog y galwadau ateb.
Mewn ymateb i’r pryderon, a chyda gwyliau ysgol yr haf ar droed, lle disgwylir i’r galw gynyddu eto, mae’r CHTh Dafydd Llywelyn wedi galw ar y cyhoedd i ystyried y ffordd orau o gysylltu â’r heddlu mewn sefyllfaoedd di-argyfwng, gan annog y cyhopedd I ystyried dulliau amgen i ddeialu 101.
Roedd ffocws cyfarfod Bwrdd Atebolrwydd Plismona, a gynhaliwyd yn Ysgol Uwchradd Gwernyfed, Three Cocks, Aberhonddu, Powys, ar Flaenoriaeth 1 Cynllun Heddlu a Throseddu 2021 – 2025; Cefnogir Dioddefwyr.
O dan y flaenoriaeth hon, mae’r CHTh yn gofyn i’r Heddlu ddangos ymatebion effeithlon ac effeithiol i alwadau’r cyhoedd am gymorth, a fyddai’n cefnogi lefelau cywir o gofnodi troseddau, ac adnabod dioddefwyr.
Mae cofnodi troseddau cywir yn cynnwys monitro niferoedd a thueddiadau cyffredinol ar gyfer galwadau 999 a 101, gyda Heddlu Dyfed-Powys yn cyflwyno papur ar ddata 999 a 101 i'r CHTh yn y cyfarfod.
Roedd y data’n dangos bod yr Heddlu wedi profi 9% yn fwy o alwadau 999 y mis ar gyfartaledd rhwng Gorffennaf a Rhagfyr 2022 o gymharu â’r un cyfnod yn 2021. Cyrhaeddodd y cynnydd hwn ei uchafbwynt ym mis Awst, gyda Chanolfan Reoli’r Heddlu yn delio â 18% yn fwy o alwadau yn ystod y mis na'r flwyddyn o'r blaen.
Mae’r galw am ymateb brys yn parhau i godi, gyda’r cynnydd mwyaf ym mis Mai 2023 (34%) a Mehefin 2023 (51%). Mae hyn yn cyfateb i gyfartaledd o 1,816 o alwadau 999 ychwanegol y mis. Mae'r sefyllfa hon yn adlewyrchu’r sefyllfa o fewn Heddluoedd eraill sydd hefyd wedi gweld cynnydd yn eu lefelau o alw am alwadau 999.
Diweddarodd Samsung eu nodwedd gwasanaeth galwadau brys SOS ffôn symudol android ddiwedd mis Ebrill eleni, a gafodd effaith ganlyniadol ac andwyol ar y gwasanaeth brys 999. Gwelodd hyn gynnydd sylweddol yn nifer y galwadau 999 a dderbyniwyd gan Heddluoedd ar draws y DU a chreodd alw digynsail o fewn Canolfan Gyfathrebu’r Heddlu o fewn Heddlu Dyfed-Powys. Mae hyn yn rhannol yn egluro rhai o'r cynnydd yn y galw am 999 a brofwyd gan HDP, ar gyfer Mai a Mehefin. Ers hynny mae Samsung wedi rhyddhau atgyweiriad ar gyfer y nodwedd argyfwng SOS ac mae'n braf nodi bod y galw am 999 bellach wedi lleihau mewn cyfaint, fodd bynnag, mae'n dal i ddangos fel cynnydd yn y galwadau 999 a dderbyniwyd.
Dangosodd data galwadau 101 Heddlu Dyfed-Powys fod dros hanner y galwadau 101 yn ymwneud â materion nad oeddent yn ymwneud â’r heddlu neu geisiadau am gyngor ac arweiniad. Mae'n cymryd mwy o amser i ateb y mathau hyn o alwadau wrth i'r Heddlu flaenoriaethu galwadau risg uchel.
Dywedodd y Comisiynydd Heddlu a Throsedd, Dafydd Llywelyn; “Rwy’n falch o adrodd bod gan Heddlu Dyfed-Powys un o’r Canolfanau Rheoli Cyswllt sy’n perfformio orau yn y ffordd y mae’n brysbennu galwadau, yn asesu anghenion, yn nodi erledigaeth dro ar ôl tro ac yn darparu cyngor atal trosedd. Mae'n gydbwysedd manwl rhwng darparu'r safon uchel hon o ofal ac ateb galwadau'n gyflym.
“Mae galwadau sy'n cael eu trin yn well yn cymryd mwy o amser i'w datrys, sy'n golygu bod y rhai sy'n delio â galwadau yn brysur yn hirach ac felly'n methu â derbyn galwadau newydd mor brydlon. Fodd bynnag, gall y rhai sy'n delio â galwadau sy'n casglu rhagor o wybodaeth o'r cychwyn cyntaf arwain at arbedion effeithlonrwydd ymhellach i lawr y llinell ymchwilio, ac yn hollbwysig, mae'n sicrhau bod y cyhoedd yn cael eu diogelu.
“Fel eich Comisiynydd Heddlu a Throseddu, rwyf wedi ymrwymo i sicrhau eich diogelwch a hyrwyddo cyfathrebu effeithiol rhwng ein cymuned a’r heddlu. Heddiw, ar ôl ystyried y papur sy’n dangos data 999 a 101 yn y Bwrdd Atebolrwydd Plismona, a gyda’r tymor gwyliau ar droed lle rydym bob amser yn gweld cynnydd yn y galw, rwy’n eich annog i gyd i gymryd eiliad ac ystyried y ffordd orau o gysylltu â’r heddlu yn sefyllfaoedd nad ydynt yn rhai brys.
“Os oes trosedd ar y gweill, perygl i fywyd, neu risg o anaf difrifol a, neu ddifrod i eiddo, mae angen rhoi sylw i hyn ar unwaith a dylid ei riportio bob amser trwy 999. Fodd bynnag, mae’r un mor bwysig cydnabod nad yw pob digwyddiad yn gofyn am y yr un lefel o frys. Am unrhyw beth arall, rwy’n annog y cyhoedd i ddefnyddio dulliau eraill o gysylltu â’r heddlu, fel y gallwn sicrhau bod llinellau brys yn parhau i fod ar gael i’r rhai sydd eu hangen mewn gwirionedd.
“Yn yr oes ddigidol sydd ohoni, rydym yn ffodus bod gennym sianelau amrywiol y gallwn gysylltu â’n heddlu lleol drwyddynt.
“Yn ogystal â galwadau ffôn, rydym yn eich annog i archwilio dulliau ar-lein a llwyfannau cyfryngau cymdeithasol a ddefnyddir gan Heddlu Dyfed-Powys. Mae’r llwyfannau hyn yn aml yn darparu diweddariadau gwerthfawr, cyngor atal trosedd, a chyfleoedd ymgysylltu cymunedol, sy’n eich galluogi i gysylltu ac ymgysylltu â’r heddlu a chael y wybodaeth ddiweddaraf am faterion lleol.
“Trwy ddefnyddio’r sianeli amgen hyn, gallwn gyda’n gilydd gyfrannu at blismona mwy ymatebol ac effeithlon, gan alluogi Heddlu Dyfed-Powys i ganolbwyntio ar sefyllfaoedd argyfyngus tra’n dal i fynd i’r afael â phryderon ac anghenion ein cymuned.”
DIWEDD
Rhagor o fanylion:
Gruff Ifan
Pennaeth Cyfathrebu ac Ymgysylltu
gruffudd.ifan@dyfed-powys.police.uk
