04 Maw 2024
Mynychodd dros 150 o bobl Gynhadledd Gŵyl Ddewi flynyddol Comisiynydd yr Heddlu a Throseddu Dafydd Llywelyn ar Fawrth 1af, gyda’r ffocws eleni ar Gydnabod Bregusrwydd o fewn Troseddwyr.
Mae cydnabod bregusrwydd troseddwyr yn hanfodol ar gyfer datblygu agwedd fwy cynnil ac effeithiol at gyfiawnder troseddol yn ôl CHTh Llywelyn. Mae nodi a deall gwendidau yn caniatáu ar gyfer ymyriadau targedig ac effeithiol a fydd yn helpu i leihau risgiau aildroseddu ac erledigaeth.
Drwy fynd i’r afael â’r materion sylfaenol sy’n cyfrannu at ymddygiad troseddol, mae gwell siawns o dorri’r cylch aildroseddu a hyrwyddo newid cadarnhaol hirdymor. Darparodd y Gynhadledd fewnwelediad i sut mae amrywiaeth o sefydliadau a darparwyr gwasanaethau cymorth yn gweithio i ddeall pa mor agored i niwed yw troseddwr; sut maent yn nodi sefyllfaoedd lle gallai troseddwyr fod mewn perygl o gael eu herlid o fewn y system cyfiawnder troseddol; a sut maent yn cefnogi rhoi mesurau diogelu priodol ar waith i amddiffyn unigolion agored i niwed rhag niwed.
Mynychodd tua 100 o westeion y gynhadledd mewn person i Bencadlys yr Heddlu, gyda 65 arall yn bresennol ar-lein.
Ymhlith y siaradwyr gwadd roedd Michelle John, o PEGS Support, Rebecca Zerk ac Elize Freeman o Ganolfan Oedran, Rhywedd a Chyfiawnder Cymdeithasol Prifysgol Aberystwyth; Mike Wilkinson, o New Pathways, Victoria Harris o HMPPS a Gemma Humphreys o Ymddiriedolaeth Nelson.
Wrth siarad yn dilyn y Gynhadledd, dywedodd Mr Llywelyn: “Roedd yn bleser mawr i mi gynnal fy wythfed Cynhadledd Dydd Gŵyl Dewi eleni, a oedd yn canolbwyntio ar gydnabod bregusrwydd troseddwyr.
“Mae’n bwysig cydnabod bod llawer o droseddwyr yn aml yn ddioddefwyr eu hunain, a allai fod wedi profi troseddau yn waeth na’u rhai nhw. Yn ogystal, mae nifer sylweddol ohonynt yn dioddef o broblemau iechyd meddwl.
“Mae deall y ffactorau sylfaenol hyn yn hanfodol wrth i ni ymdrechu i ddod o hyd i atebion mwy tosturiol ac effeithiol. Nid anfon unigolion i garchar yw'r dewis gorau bob amser; yn lle hynny, rhaid inni gydweithio i ddatblygu ymyriadau a systemau cymorth sy'n mynd i'r afael â'r achosion sylfaenol ac yn cyfrannu at adsefydlu.
“Rwy’n hynod ddiolchgar i’r holl siaradwyr am eu mewnbwn gwerthfawr yn ystod y dydd, ac i’r holl fynychwyr, a ddaeth draw i ddatblygu eu gwybodaeth yn y maes hwn a rhannu eu barn a’u syniadau.”
Dywedodd y siaradwr gwadd Michelle John, sy’n Gyfarwyddwr Cymorth PEGS, ac a oedd yn y Gynhadledd i drafod Cam-drin Plant i Rieni; “Roedd yn wych cael gwahoddiad i siarad yng Nghynhadledd Comisiynwyr yr Heddlu a Throseddu.
“Roedd gallu tynnu sylw at effaith cam-drin plentyn i riant trwy lens bregusrwydd, adnabod a deall cam-drin plentyn i riant, yn rhoi’r ffocws yn gadarn ar y teuluoedd y mae’r math hwn o gam-drin yn effeithio arnynt.
“Drwy ddigwyddiadau fel hyn, gallwn godi ymwybyddiaeth, hyrwyddo cyfathrebu, gwella ymatebion ac annog newid.
“Roedd yn bleser clywed gan yr holl siaradwyr eraill a llongyfarchiadau mawr i bawb a fu’n ymwneud â chreu a chyflwyno digwyddiad mor bwerus sy’n procio’r meddwl”.
DIWEDD
Rhagor o fanylion:
OPCC.Communication@dyfed-powys.police.uk
CHTh Dafydd Llywelyn gyda Siaradwyr Gwadd o Brifysgol Aberystwyth
